Duv

Trioplate med stemme, trekkspel og fiolin i akustisk og nært lydbilete. Vinteren 2024 inviterte vokalisten Ingebjørg Loe Bjørnstad med seg Frode Haltli og Håkon Aase til Øra studio i Trondheim for å spela inn låtane hennar. Teknikar Kyrre Laastad samla alle i eitt rom og la til rette for ei live innspeling med eit intimt og kammermusikalsk lydbilete. I løpet av tre dagar spela dei inn dei 11 låtane, og musikarane sin eigenart og det organiske samspelet har fått god plass på innspelinga. Utøvarane sin bakgrunn frå jazz, samtidsmusikk og folkemusikk kan høyrast i komposisjonane og arrangementa. Tekstane krinsar rundt kroppslege uttrykk for kjensler, og skildrar dualitetar knytta til vald og sensualitet, det vakre og stygge, einsemd og fellesskap. I tillegg til sine eigne låtar har Ingebjørg fått låna tre nydelege melodiar av Håkon Thelin, Sondre Meisfjord og Trygve Seim som ho har sett tekstar til. Noko av materialet er arrangert av Ingebjørg i forkant av innspelinga, og noko er utarbeidd i studio i felleskap av dei tre musikarane.