Selja

Skottland har Iona, England har Lindisfarne og Frankrike har Mont St. Michel. Noreg har heilagøya Selja. På den vesle øya ved Stad ligg det største ruinanlegget i landet, i eit makelaust landskap. Klostertårnet står att i full høgde, og oppe i fjellsida ligg store terrassar framfor heilagstaden Sunnivahola. <br/> <br/>Selja vart i år 996 det første pilegrimsmålet i landet, då kong Olav Tryggvason fann relikviar i hola. Kring 1068 vart Selja bispesete for heile Vestlandet. På slutten av 1000-talet fekk Selja kanskje det første kloster i landet. Gjennom heile mellomalderen valfarta pilegrimar til Selja for å ære Sankta Sunniva og Seljumennene. <br/> <br/>Sankta Sunniva er den første norske helgen, den einaste kvinnelege, og ho utgjer saman med Sankt Olav det kongelege, norske helgenparet. <br/> <br/>Ingen kjem til Selja utan å undre seg. Og ingen reiser derifrå urørd.