Helsing Frå Jæren

HELSING FRÅ JÆREN <br/>Gamle postkort frå Klepp, Time og Hå <br/> <br/>Sidan 1900-talet har det vore store endringar på Jæren. Dette vert godt dokumentert på gamle postkort. Per Vold på Vigrestad har ei stor samling av slike postkort, og i denne boka har me fått høve til å løfta fram gamle postkort frå heile Jæren. Me har òg fått hjelp med bilettekstar av Hans Torgny Indrebø (Hå), Kjell Olav Stange- land (Time), Reidar og Svein Efteland (Klepp). <br/> <br/>På byrjinga av 1900-talet, før det fanst moderne biletmedia som fjernsyn, film og internett, var postkort svært populære. Saman med aviser og tidsskrift var dei ein viktig og vanleg måte å spreia aktuelle bilete både av nyhende og kjendisar. I dag er gamle postkort ettertrakta, og sett på som kulturhistoriske samlarobjekt. <br/> <br/>«Helsing frå Jæren» viser korleis Jæren ein gong var, og korleis utviklinga har vore. Her finn ein postkort frå byrjinga av 1900-talet og fram til 1960. Med opplysningane som lesaren finn i bilettekstane, skapar dette ein forteljande heilskap og ei bok som bør finnast i ein kvar heim der det bur folk som er interessert i Jæren.